News Categories: Datblygu

Gwobr adfer am gyfoethogi tref Rhuthun

Yn ddiweddar cyflwynodd Cymdeithas Ddinesig Rhuthun a’r Cylch Wobr Quayle 2014 i Tai Gogledd Cymru am ailddatblygu rhes o fythynnod adfeiliedig yn Stryd Mwrog, Rhuthun.

Caiff y wobr, a enwyd ar ôl un o drigolion lleol nodedig Rhuthun, sef y diweddar Athro William Quayle, ei chyflwyno’n rheolaidd i berchnogion adeiladau preifat, cyhoeddus a masnachol, sydd wedi cyfoethogi’r dref a’r pentrefi lleol drwy ddylunio a chynllunio newydd da neu drwy adfer sensitif.

Dyfarnodd y beirniaid fod yr ailddatblygiad yn Stryd Mwrog yn enillydd teilwng.

Fel yr eglurodd Miles Anderson, Ysgrifennydd Cymdeithas Ddinesig Rhuthun a’r Cylch:

“Mae’r llety amlbwrpas newydd sydd wedi ei godi yn lle’r hen adeilad adfeiliedig wedi ei adeiladu gyda sensitifrwydd ac i safon uchel iawn. Ac mae’r hen flwch postio hefyd wedi cael ailddefnydd. Er mai rhes fechan yw’r adeiladau, mae’r gwaith adfer wedi cael ei gyflawni i’r safon uchaf ac yn sicr yn denu’r llygad – mewn ffordd bleserus! Llongyfarchiadau mawr i Gymdeithas Tai Gogledd Cymru.”

Derbyniodd Peter Gibson, Cadeirydd Bwrdd Grŵp TGC, y wobr mewn digwyddiad a gynhaliwyd gan Gymdeithas Ddinesig Rhuthun a’r Cylch ar ddydd Gwener, 26 Mehefin yng Nghanolfan Gymunedol Llanfwrog, Rhuthun.

Dywedodd Paul Diggory, Prif Weithredwr Tai Gogledd Cymru:

“Mae Tai Gogledd Cymru yn hynod falch o ennill y wobr hon. Rydym yn frwd dros ddod â bywyd newydd i gartrefi gwag, gan helpu i wella cymunedau yn ogystal â galluogi tenantiaid newydd i fwynhau bywyd yn eu cartrefi newydd. Rydym wrth ein bodd bod cymuned Rhuthun yn ymfalchïo yn y prosiect gymaint â ni.”

 

Partneriaeth yn creu cartrefi newydd ar Ynys Môn

Mae pump o denantiaid yn elwa o gartrefi newydd sbon i’w rhentu diolch i bartneriaeth gyda Chymdeithas Tai Gogledd Cymru, Llywodraeth Cymru a Cyngor Sir Ynys Môn.

Mae’r prosiect tai cymdeithasol Rhes Capel ar safle yng Nghaergybi wedi cael ei ariannu ar y cyd gan Gymdeithas Tai Gogledd Cymru a cronfa Rhaglen Lleoedd Llewyrchus Llywodraeth Cymru.

Dywedodd Lesley Griffiths, y Gweinidog dros Gymunedau a Mynd i’r Afael â Thlodi:

“Rwy’n hapus bod Llywodraeth Cymru wedi gallu cefnogi y dablygiad yma gyda chyllid o bron i £310,000. Mae’r cynllun wedi creu cartrefi o safon uchel i bobl lleol, a hefyd wedi defnyddio cwmniau a chyflenwyr lleol ac felly wedi cefnogi yr economi lleol”.

“Mae’r datblygiad yn esiampl ardderchog o  gydweithio effeithiol rhwng Llywodraeth Cymru, Cyngor Sir Ynys Môn, Cymdeithas Tai Gogledd Cymru, a’r sector adeiladu tai preifat lleol, sydd yn helpu i ddelifro ein gweledigaeth ar gyfer tai yng Nghymru. Rwy’n dymuno pob hapusrwydd i’r tenantiaid yn eu cartrefi newydd”.

Mae’r rhes o bum annedd newydd tri person, dwy ystafell wely, wedi cael ei adeiladu ar safle yr hen Eglwys Fethodistaidd Saesneg yn Ffordd Longford, ac fe’i lleolir yn agos at ysgolion lleol a chyfleusterau eraill. Mae’r cartrefi newydd wedi cael eu hadeiladu i fodloni safonau ansawdd dylunio tai Llywodraeth Cymru.

Dywedodd Paul Diggory, Prif Weithredwr Tai Gogledd Cymru:

“Mae Rhes Capel yn brosiect gwych a rydym yn falch o fod wedi gweithio’n agos gyda Chyngor Sir Ynys Môn a Llywodraeth Cymru. Mae adfywio Caergybi yn dod yn ei flaen ac mae’r prosiect hwn yn ddatblygiad gwych arall i Dai Gogledd Cymru ei reoli.”

Ychwanegodd deilydd portfolio Gwasanaethau Cymdeithasol a Thai Cyngor Sir Ynys Môn, y Cynghorydd Aled Morris Jones :

“Rydym yn falch o fod wedi chwarae rhan bwysig wrth wireddu’r datblygiad hwn, sy’n cyfrannu at ein hamcanion tai ac adfywio.”

 

Cynlluniau gofal ychwanegol arloesol yn cipio prif wobrau’r diwydiant adeiladu

Cafodd cynlluniau gofal ychwanegol Tai Gogledd Cymru noson lwyddiannus yn ddiweddar yng Ngwobrau Rhagoriaeth Adeiladu rhanbarthol Rheoli Adeiladu Awdurdodau Lleol (LABC).

Enillodd Cae Garnedd, Bangor, cynllun gofal ychwanegol mwyaf newydd Tai Gogledd Cymru wobr sirol a rhanbarthol Gwynedd am y ‘Prosiect Dylunio Cynhwysol Gorau’ a chipiodd Hafod y Parc, Abergele y wobr am ‘Tai Cymdeithasol/Fforddiadwy Gorau’ ar gyfer rhanbarth Conwy.

Cyflwynwyd y gwobrau i K&C Construction, sef y tîm oedd y tu ôl i’r cynlluniau gofal ychwanegol arloesol yng Ngogledd Cymru, mewn digwyddiad gwobrwyo a gynhaliwyd yn yr Urban Resort Village, Caer ar ddydd Gwener 24 Ebrill, 2015.

Nod gwobrau’r LABC yw dathlu rhagoriaeth mewn safonau adeiladu, arloesedd technegol a dylunio cynaliadwy.

Dywedodd Paul Diggory, Prif Weithredwr Tai Gogledd Cymru:

Rydym wrth ein boddau gyda’n llwyddiant ar y noson. Rydym yn hynod falch o’n cynlluniau gofal ychwanegol ond mae derbyn y wobr yma gan y diwydiant yn atgyfnerthu’r balchder hynny.

Hoffwn longyfarch ein partneriaid adeiladu, K&C sydd wedi gweithio ar y cyd gyda’n tîm trwy gydol y broses ddylunio ac adeiladu, gan gynhyrchu datblygiadau gwych. Yn sicr mae hyn yn llwyddiant haeddiannol i holl dîm K&C.”

Roedd Bleddyn Jones, Rheolwr K&C Construction hefyd ar ben ei ddigon:

Rwyf wrth fy modd bod K&C Construction wedi derbyn y gwobrau hyn ac rwy’n credu ei bod yn deyrnged addas iawn i ymroddiad a gwaith caled yr holl dîm. Mae llwyddiant y prosiectau yn adlewyrchu ein perthynas waith gydweithredol gref gyda Chyngor Sir Gwynedd a Tai Gogledd Cymru a’r holl ymgynghorwyr sydd wedi ymwneud â’r prosiectau.”

Nid dyna oedd yr unig lwyddiant fodd bynnag, oherwydd llwyddodd Tai Gogledd Cymru a Pure Residential hefyd i ennill y wobr ‘Tai Cymdeithasol/Fforddiadwy’ ar gyfer Sir Ddinbych am y gwaith diweddar a wnaed yn adnewyddu Plas Penyddeuglawdd, Ffordd Pendyffryn, Y Rhyl, sef un o’r tai hynaf yn y Rhyl.

Bydd Cae Garnedd yn awr yn mynd ymlaen i Rowndiau Terfynol gwobrau’r LABC a gaiff eu cynnal ar ddydd Mawrth, 10 Tachwedd, 2015 yng Ngwesty’r Lancaster, Llundain.

Bywyd newydd i adeilad mwyaf hanesyddol y Rhyl

Mae un o adeiladau hynaf y Rhyl wedi cael bywyd newydd a darparu tai fforddiadwy o safon i bobl y Rhyl.

Yn wreiddiol yn rhan o Blas Penyddeuglawdd, mae rhannau o’r eiddo sydd wedi cael ei ailddatblygu ar Ffordd Pendyffryn, Y Rhyl yn dyddio o’r 17eg ganrif, ac mae’n debygol mai hwn yw’r adeilad hynaf sydd wedi goroesi yn y Rhyl.

Pan ddaeth yr eiddo i feddiant Tai Gogledd Cymru roedd yr adeilad rhestredig Gradd II mewn cyflwr adfeiliedig, ac fe’i rhestrwyd fel adeilad ‘mewn perygl’ gan Gyngor Sir Ddinbych.

Dywedodd Paul Diggory, Prif Weithredwr Tai Gogledd Cymru:

“Roedd Plas Penyddeuglawdd mewn man amlwg o fewn y dref ond yn raddol daeth yn ddolur llygad wrth i’w gyflwr ddirywio, gan ddenu fandaliaid ac ymddygiad gwrthgymdeithasol. Gall eiddo gwag gael effaith negyddol ar ganfyddiad pobl o ardal a’r gobaith yw y bydd adnewyddu ac ailfeddiannu’r eiddo yn cael effaith gadarnhaol ar y rhan yma o’r Rhyl.”

Dechreuodd y rhaglen ailddatblygu ac atgyweirio uchelgeisiol yn 2014 fel rhan o Brosiect Cartrefi Gwag Cyngor Sir Ddinbych. Bu’r contractwyr a benodwyd, sef Pure  Residential and Commercial Ltd yn gweithio’n agos gyda Swyddogion Cadwraeth y Cyngor er mwyn ailddatblygu ac atgyweirio’r adeilad rhestredig Gradd II mewn ffordd ofalus gan ddefnyddio dulliau a deunyddiau adeiladu traddodiadol.

Y canlyniad yw tri thŷ dwy ystafell wely a thri byngalo dwy ystafell wely. Mae nodweddion cymeriad gwreiddiol yr adeilad wedi cael eu cadw lle’r oedd hynny’n bosibl, ond gan ymgorffori ffitiadau effeithlon o ran ynni, a fydd o fudd i denantiaid newydd.

Ychwanegodd Paul:

“Mae’r cynllun hwn yn rhan bwysig o Strategaeth Cartrefi Gwag Cyngor Sir Ddinbych a Tai Gogledd Cymru, gyda’r bwriad o ddod â bywyd newydd i gartrefi gwag. Mae’n adeilad rhestredig pwysig yn y Rhyl, a fu unwaith mewn perygl, ac sydd bellach wedi cael ei achub yn llwyddiannus, gan greu cartrefi o safon i bobl leol.” 

Dywedodd y Cynghorydd  Hugh Irving, Aelod Cabinet Arweiniol gyda chyfrifoldeb am Gwsmeriaid a Chymunedau: 

“Mae hon yn enghraifft wych o sut mae’r Cyngor yn gweithio gyda’i bartneriaid i wella ansawdd bywyd y trigolion, yn ogystal â’r ymdrechion a wnaed i ddod ag adeiladau hanesyddol a rhestredig yn ôl i ddefnydd. Mae eiddo adfeiliedig yn gallu hagru’r dirwedd a chael effaith ddrwg ar ddelwedd weledol ardal. Rydym wrth ein bodd gyda chanlyniad y gwaith datblygu hwn.”

Trosglwyddodd Tai Gogledd Cymru y goriadau i’w cartrefi newydd i’r tenantiaid bodlon ym mis Rhagfyr ac ers hynny maent wedi ymgartrefu’n hapus yn eu cartref newydd.

Preswylwyr Cae Garnedd yn symud i mewn

Mae’r gwaith adeiladu wedi gorffen erbyn hyn ar Gae Garnedd, cynllun tai gofal ychwanegol £8.35 miliwn Tai Gogledd Cymru ym Mangor ac fe ddechreuodd y preswylwyr symud i mewn i’w cartrefi newydd yn Rhagfyr 2014.

Mae Cae Garnedd yn gynllun gofal i bobl hŷn wedi’i ddatblygu mewn partneriaeth rhwng Tai Gogledd Cymru a Chyngor Gwynedd. Dyma’r cynllun gofal ychwanegol cyntaf o’i fath ym Mangor ac mae’n cynnig ffordd wahanol o fyw i bobl hŷn, i fyw’n annibynnol gyda gofal a chefnogaeth.

Mae’r cynllun yn cynnwys 15 o fflatiau gydag un ystafell wely a 27 fflat gyda dwy ystafell wely, ac mae pob un yn cynnwys cegin, lle byw ac ystafell ymolchi. Mae’r preswylwyr yn gallu defnyddio cymaint neu gyn lleied o’r cyfleusterau cymunedol sydd ar gael ag y dymunant gan gynnwys mannau gorffwys, hamdden a gweithgareddau, yn ogystal ag ardal fwyta ganolog wedi ei harlwyo. Mae gofal pedair awr ar hugain ar gael ac yn cael ei bennu gan anghenion pob unigolyn y gellir addasu cynllun gofal ar eu cyfer wrth i’w hanghenion newid.

Dywedodd Paul Diggory, Prif Weithredwr Tai Gogledd Cymru:

“Dyma’r cynllun gofal ychwanegol cyntaf ym Mangor ac mae’n rhoi dewis arall pwysig i aelodau hŷn ein cymuned wrth ystyried eu dewisiadau tai. Rydym yn hynod falch o allu dod â chynllun fel hwn i’r ddinas.”

“I lawer o bobl hŷn, gellir ystyried cyfleoedd byw ar bob pen o’r sbectrwm o fyw’n annibynnol llawn i ofal preswyl neu nyrsio. Mae Gofal Ychwanegol yn pontio’r bwlch hwn ac yn cynnig dewis i bobl gadw eu byw’n annibynnol gyda chefnogaeth a gofal pan fo angen.”

Ychwanegodd Paul:

“Mae’r adeilad ei hun wedi ei leoli mewn safle ardderchog o fewn y ddinas, gan gynnig mynediad hawdd i gyrchfannau ac atyniadau allweddol o fewn y ddinas.”

Dywedodd y Cynghorydd Gareth Roberts, Aelod Cabinet Cyngor Gwynedd ar gyfer Gofal:

“Fel Cyngor, rydym yn falch iawn o weld preswylwyr yn symud i mewn i’r cyfleuster tai gofal ychwanegol yng Nghae Garnedd. Bydd y bartneriaeth hon rhwng Cyngor Gwynedd a Tai Gogledd Cymru yn caniatáu pobl i barhau i fyw’n annibynnol mewn cymuned ddiogel a chartrefol gyda gwasanaethau gofal hyblyg.”

“Mae’r boblogaeth hŷn yng Ngwynedd yn mynd i gynyddu dros y blynyddoedd nesaf ac mae’n rhaid i ni baratoi rŵan ar gyfer y gofynion a ddaw yn anochel ar ein gwasanaethau, a gallu rhoi dewis i bobl o sut a ble maent am fyw.”

“Mae datblygiadau fel Cae Garnedd yn caniatáu i bobl hŷn gael y rhyddid i fyw’n annibynnol yn eu cartref eu hunain gyda’r tawelwch meddwl bod cefnogaeth ar gael pan fo angen.”

Gallwch ddod hyd a mwy o wybodaeth am Cae Garnedd yma. Os hoffech wybod mwy neu drefnu ymweliad yna cysylltwch â Rheolwr y Cynllun, Carwyn George yn [email protected] neu ffoniwch 01492 563287.

Lesley Griffiths AC yn agos yn swyddogol cynllun Gofal Ychwanegol Hafod y Parc, Abergele

Mae cynllun Gofal Ychwanegol arloesol Tai Gogledd Cymru yn Hafod y Parc wedi cael ei agor yn swyddogol gan Lesley Griffiths AC, y Gweinidog Cymunedau a Threchu Tlodi, ar ddydd Iau 20 Tachwedd, 2014.

Mae Hafod y Parc yn gynllun Gofal Ychwanegol newydd gwerth £11 miliwn yn Rhodfa Cinmel sy’n cynnig dewis gwell i bobl dros 60 oed, gan ddarparu byw’n annibynnol gyda rhaglen gofal a chefnogaeth y gellir ei haddasu a’i hasesu wrth i’w hanghenion unigol newid. Mae’r cynllun wedi derbyn dros £6m oddi wrth Raglen Grant Tai Cymdeithasol Llywodraeth Cymru.

Daeth preswylwyr, staff a gwesteion ynghyd i ddathlu agoriad swyddogol y cynllun wrth i Lesley Griffiths AC ddadorchuddio plac i nodi’r achlysur. Cafodd te prynhawn ei weini a chafwyd perfformiadau gan Gôr Ysgol Glan Morfa, yr ysgol leol hefyd.

Manteisiodd y gwesteion ar y cyfle i fynd o amgylch cyfleusterau safonol gwych Hafod y Parc. Mae’r safle wedi’i leoli o fewn parcdir coediog deiliog hardd, ac mae’r cynllun yn cynnwys llu o ardaloedd cymunedol modern ond cartrefol, gan gynnwys sawl lolfa; bwyty; siop trin gwallt ac ystafell driniaeth maldod; ystafell snwcer a gemau; ystafell TG a llawer mwy.

Cwblhawyd y gwaith adeiladu yn Ebrill 2014 ac mae pob un o’r 49 flat un a dwy ystafell wely wedi cael eu llenwi. Mae’r preswylwyr wedi ymgartrefu’n gyflym yn eu cartrefi newydd, gan sefydlu nifer o weithgareddau cymdeithasol a hyd yn oed yn ffurfio band preswyl.

Dywedodd Betty Fraser, un o breswylwyr Hafod y Parc:

“Hafod y Parc yw’r lle gorau i mi fyw ynddo erioed, nid wyf erioed wedi teimlo mor hapus a bodlon yn fy mywyd. Mae yma fwyd bendigedig a chefnogaeth ddiamod gan y staff, mae’n anhygoel! “

Dywedodd Lesley Griffiths, y Gweinidog Cymunedau a Threchu Tlodi:

“Rwy’n falch iawn fod Llywodraeth Cymru wedi gallu cefnogi’r cyfleuster yma yn Hafod y Parc a fydd yn gwneud gwahaniaeth gwirioneddol i fywydau pobl, ac a fydd yn helpu i amddiffyn pobl rhag cael eu hynysu neu fod yn unig.”

“Mae cynlluniau fel hyn yn cefnogi ystod o anghenion tai ac rwyf wedi cyfarfod â nifer o breswylwyr heddiw sydd i gyd yn hynod o fodlon gyda’u cartrefi newydd.”

“Mae’r buddsoddiad yma nid yn unig wedi darparu cartrefi sydd eu dirfawr angen, mae hefyd wedi cefnogi’r economi drwy roi hwb i swyddi a thwf economaidd a darparu cyfleoedd hyfforddi i bobl leol.”

Ychwanegodd Paul Diggory, Prif Weithredwr Tai Gogledd Cymru:

“Rydym mor falch o Hafod y Parc, mae’n gynllun eithriadol ac mae’n hawdd gweld apêl y datblygiad.”

“Mae pobl hŷn yn haeddu mwy o ddewis yn eu blynyddoedd diweddarach ac mae Hafod y Parc yn cynnig dewis amgen atyniadol iawn i fywyd cartref a gofal preswyl. I ni, mae Gofal Ychwanegol yn golygu galluogi pobl i wneud dewisiadau tai a gofal ystyriol gyda rhyddid hyblygrwydd wrth i’w hanghenion newid.”

Gweinidog yn gweld effaith cefnogaeth Llywodraeth Cymru i dai

Mae cynllun gofal ychwanegol sydd newydd agor yn Abergele, a gafodd gefnogaeth Grant Tai Cymdeithasol Llywodraeth Cymru, yn darparu cyfleusterau ardderchog ar gyfer y preswylwyr yn ôl y Gweinidog Cyllid, Jane Hutt.

Mae Cynllun Gofal Ychwanegol Hafod y Parc yn darparu byw’n annibynnol modern i bobl dros 60 oed ac a groesawodd y preswylwyr cyntaf ym mis Ebrill eleni. Mae’n cynnwys 49 o fflatiau hunangynhwysol ac erbyn hyn mae’r cynllun yn llawn.

Mi wnaeth y cynllun gwerth £10.7m elwa o £6.2m gan Raglen Grant Tai Cymdeithasol Llywodraeth Cymru gyda’r gweddill yn cael ei ariannu gan Gymdeithas Tai Gogledd Cymru.

Mae cyfleusterau Hafod y Parc yn cynnwys gofal 24 awr ar y safle a chymorth, tŷ bwyta, salon gwallt, ystafell hobïau ac ardal gardd patio.

Dywedodd y Gweinidog:

“Mae cynlluniau gofal ychwanegol yn caniatáu i bobl dros 60 oed fyw’n annibynnol tra’n derbyn gwasanaethaugan dtîm gofal profiadol sydd ar y safle 24 awr y dydd, gan ddarparu gofal o ansawdd uchel.”

“Mae’r cyfleusterau yma yn Hafod y Parc yn ardderchog ac yn rhoi pob cyfle i breswylwyr fyw mor annibynnol â phosibl mewn amgylchedd cymunedol.”

“Mae’r prosiect hefyd wedi bod o fudd i’r gymuned yn ystod y broses adeiladu, gyda chyfleoedd ar gyfer cynlluniau prentis saer a lleoliadau gwaith.”

Dywedodd Paul Diggory, Prif Weithredwr Cymdeithas Tai Gogledd Cymru:

“Mae Hafod y Parc yn ddatblygiad eithriadol y mae pawb ohonom yn hynod o falch ohono. Er mai dim ond ychydig wythnosau yn ôl yr agorodd Hafod y Parc ei ddrysau, roedd y cynllun yn llawn yn syth, sy’n adlewyrchu safon y tai sydd ar gael yno a’r angen a’r galw clir am y cysyniad gofal ychwanegol o fyw.”

Cynllun Hafod y Parc yw’r pedwerydd cynllun gofal ychwanegol sy’n gweithredu yn Sir Conwy.

Bywyd newydd i gartrefi yn Rhuthun

Yng nghanol tref Rhuthun, mae rhaglen adnewyddu ar raddfa fawr wedi cael ei chwblhau, i wella rhes o dai oedd wedi cael ei gadael, a bellach maen nhw’n gartrefi newydd o ansawdd da i bobl leol.

Mae’r tai ar Stryd Mwrog, mewn lle amlwg yng Nghanol Tref Rhuthun, ac erbyn hyn wedi cael eu trawsnewid ar ôl i Tai Gogledd Cymru eu cael fel rhan o gynllun Cartrefi Gwag Sir Ddinbych.

Mae tenantiaid newydd wedi cael pob un o’r cartrefi yma erbyn hyn, ac wedi cael y goriadau i ddau dŷ, dau fflat, a dau o’r byngalos newydd sydd wedi cael eu hadeiladu tu cefn i’r tai. Roedd y gwaith yn golygu dymchwel rhai adeiladau atodol ac wedyn bod y contractwr lleol, K&C, yn tynnu popeth allan o’r tai i gyrraedd at yr adeiladwaith sylfaenol cyn dechrau ar y prosiect tymor hir i’w hadfer.

Mae galw yn Rhuthun i ddatblygu cartrefi i bobl leol, ac mae’r cynllun hefyd yn gwella canol y dref ac yn hybu mwy o adfywio ac yn annog pobl i ddod yn ôl i’r dref.

Dyma oedd gan Phil Danson o Tai Gogledd Cymru i’w ddweud:

“Mae’r cynllun yma’n cadw at yr ethos cartrefi gwag. Mae o hefyd yn ateb pob un o’n hamcanion ni o ran creu cartrefi, trawsnewid ardaloedd a defnyddio adeiladau da sydd yma’n barod a’u cael i fyny at safonau ac anghenion modern.

Mae hi’n wych erbyn hyn gweld ein tenantiaid newydd ni’n symud i mewn a dechrau mwynhau bywyd yn eu cartrefi newydd.”

Gwelliant blasus ar y stryd fawr

Mae’r adeilad lle’r oedd y Bistro ar Stryd Fawr Llanberis wedi cael ei drawsnewid efo gwaith mawr arno, fel bod beth oedd gynt yn lle bwyta erbyn hyn yn nifer o gartrefi i bobl leol.

Roedd Tai Gogledd Cymru wedi prynu’r adeilad yn 2012 a datblygu cynlluniau i drawsnewid ac adfywio, a chreu naw o fflatiau dwy ystafell wely.

Mae croeso i’r fflatiau newydd yn Llanberis ymysg pobl sy’n gweld effeithiau’r cynnydd parhaus mewn prisiau tai, wedi’i yrru ymlaen gan y diwydiant twristiaeth, a hefyd ymysg pobl sy’n gobeithio cael cartref yn ardal y pentref prydferth hwn.

Mae hwn yn adeilad sylweddol ar y gornel, ac ers i’r Bistro gau yn 2008/9, mae wedi bod yn wag ac yn dirywio fesul dipyn. Roedd wedi mynd yn ddolur llygad ar y brif stryd ac yn denu fandaliaid a thynnu oddi wrth yr ardal o’i gwmpas.

Y contractwr lleol Celtic Souza sydd wedi rheoli’r gwaith ar ran Tai Gogledd Cymru. Mae’r cynllun wedi cael ei ddatblygu fel rhan o gydweithio ehangach rhwng Cyngor Gwynedd a Thai Gogledd Cymru, efo arian pellach oddi wrth Grant Tai Cymdeithasol Llywodraeth Cymru.

Dywedodd Paul Diggory, Prif Weithredwr Tai Gogledd Cymru:

“Mi fydd cwblhau’r prosiect yma’n cynnig gymaint o fanteision i’r gymuned leol. Rydan ni nid yn unig yn adfer a gwella adeilad mawr oedd yn cael effaith wael ar yr ardal leol, ond hefyd yn creu nifer o gartrefi ffantastig i bobl leol.”

“Mae prosiectau cartrefi gwag fel hyn yn ymwneud ag edrych ar adeiladau presennol sydd wedi cael eu hesgeuluso neu eu hanwybyddu a rhoi bywyd newydd iddynt. Mae ailddatblygu’r Bistro yn enghraifft wych o sut a pham y mae’r fenter hon yn gweithio cystal.”

Dyrannwyd tenantiaid newydd ar gyfer pob un o’r fflatiau dwy ystafell wely a chyn bo hir byddant yn symud i mewn i’w cartrefi newydd.

Cysyniad newydd mewn tai i bobl hŷn gyda gofal ym Mangor

Mae’r gwaith adeiladu ar gynllun tai gofal ychwanegol £8.35 miliwn newydd ym Mangor yn magu stêm, gan nodi datblygu cysyniad newydd mewn tai i bobl hŷn sy’n byw yny dref.

Mae Tai Gogledd Cymru, mewn partneriaeth â Chyngor Gwynedd, yn rheoli datblygiad arloesol ‘Cae Garnedd’, sy’n cael ei ddatblygu ar safle hen dŷ ar Ffordd Penrhos, a bellach mae’r fflat arddangos ar agor i’r cyhoedd.

Y cynllun gofal ychwanegol yma fydd y cyntaf o’i fath ar gyfer Bangor ac mae’n cynnig ffordd amgen o fyw ar gyfer pobl hŷn, gan ddarparu byw’n annibynnol gyda chefnogaeth gofal a chymorth. Diben Gofal Ychwanegol yw pontio’r bwlch rhwng byw’n annibynnol a gofal cartref nyrsio. Mae’n cynnig dewis i bobl hŷn o ran lefel y gofal a’r cymorth sydd eu hangen arnynt wrth fwynhau eu hannibyniaeth.

Mae’r cynllun yn cynnwys 15 o fflatiau un ystafell wely a 27 o fflatiau dwy ystafell wely, pob un yn cynnwys ei chegin, ei hystafell fyw a’i hystafell ymolchi ei hun. Gall preswylwyr ddefnyddio cymaint neu gyn lleied ag y dymunant o’r cyfleusterau cymunedol sydd ar gael. Mae’r cyfleusterau hynny yn cynnwys mannau gorffwys, hamdden a gweithgarwch, yn ogystal ag ardal ganolog ar gyfer bwyd wedi’i arlwyo. Mae gofal pedair awr ar hugain ar gael a gaiff ei bennu gan anghenion pob unigolyn y gellir addasu cynllun gofal ar eu cyfer wrth i’w hanghenion newid.

Dywedodd Paul Diggory, Prif Weithredwr Tai Gogledd Cymru:

“Dyma’r cynllun gofal ychwanegol cyntaf ym Mangor ac mae’n darparu dewis amgen pwysig i aelodau hŷn ein cymuned wrth ystyried eu hopsiynau tai. Rydym yn hynod falch o allu cynnig y cynllun hwn i’r dref.”

“I lawer o bobl hŷn, gall cyfleoedd byw fod ar y naill neu’r llall o ddau ben gwahanol iawn i’r sbectrwm, o fyw’n gwbl annibynnol i ofal preswyl neu nyrsio. Mae Gofal Ychwanegol yn pontio’r bwlch hwn ac yn cynnig dewis i gadw eu bywyd annibynnol ond gyda chymorth a gofal ar gael yn ôl yr angen.”

Ychwanegodd Paul:

“Mae’r adeilad ei hun wedi ei leoli mewn safle ardderchog, yn cynnig mynediad hawdd i gyrchfannau ac atyniadau allweddol o fewn y dref. Mae llawer o drigolion lleol eisoes wedi mynegi a chofrestru eu diddordeb. Mae’r fflat arddangos bellach ar agor ac rydym wedi penodi rheolwr cynllun a fydd yn falch i dywys pobl o gwmpas y lle.”

Ychwanegodd y Cynghorydd Wyn Williams, Aelod Cabinet Cyngor Gwynedd dros Ofal:

“Rwy’n falch iawn bod y gwaith ar y safle tai gofal ychwanegol ym Mhenrhosgarnedd yn dod yn ei flaen mor dda.”

“Ar ôl ei gwblhau, bydd Cae Garnedd yn cynnig cartref cyfforddus i bobl hŷn yn ogystal â thawelwch meddwl o gael gwasanaethau gofal hyblyg.”

Disgwylir i’r prosiect gael ei gwblhau yn ddiweddarach eleni, gyda K & C Construction o Ginmel yn gwneud y gwaith adeiladu gan gyflogi crefftwyr, cyflenwyr a masnachwyr lleol. Mae’r strwythur yn cael ei hadeiladu gan ddefnyddio deunyddiau amgylcheddol cadarn ac ar ôl cwblhau disgwylir i’r prosiect sicrhau sgôr Ardderchog safon BREEAM.